ឯកឧត្តម ហ៊ុន ម៉ានី ទទួលគ្រឿងឥស្សរិយយសជាតូបការ ពីព្រះមហាក្សត្រ
15-January-2016 | ដោយ មួយឡា
ភ្នំពេញ៖ កូនប្រុសនាយករដ្ឋមន្ត្រីកម្ពុជា គឺឯកឧត្តម ហ៊ុន ម៉ានី ដែលជាតំណាងរាស្ត្រវ័យក្មេងជាងគេបានទទួលគ្រឿងឥស្សរិយយសថ្នាក់ខ្ពស់ពីព្រះមហាក្សត្រព្រះបាទសម្តេចព្រះបរមនាថ នរោត្តម សីហមុនី តាមការស្នើសុំពីប្រធានរដ្ឋសភា។
ក្នុងព្រះរាជក្រឹត្យចុះថ្ងៃទី ១៩ ខែធ្នូ ឆ្នាំ ២០១៥ ព្រះមហាក្សត្របានប្រោសព្រះរាជទានចំពោះឯកឧត្តម ហ៊ុន ម៉ានី នូវគ្រឿងឥស្សរិយយសជាតូបការ។
អ្នកនាំពាក្យរដ្ឋសភាឯកឧត្តម ឡេង ប៉េងឡុង ប្រាប់យើងពីម្សិលមិញថា កន្លងទៅ គណៈកម្មការរៀបចំឥស្សរិយយសដែលរួមមានអនុប្រធានសភាទី ២ ឯកឧត្តម ងួន ញិល ជាប្រធាន និងឯកឧត្តម ជាម យៀប ជាសមាជិកបានប្រជុំសម្រេចស្នើបេក្ខភាពឯកឧត្តម ហ៊ុន មានី ឲ្យទទួលគ្រឿងឥស្សរិយយសជាតូបការ ដោយសារគាត់មានស្នាដៃច្រើន។
ឯកឧត្តមបន្តថា ក្រោយមកប្រធានរដ្ឋសភាសម្ដេច ហេង សំរិន បានពិនិត្យ និងយល់ព្រមស្នើបេក្ខភាពឯកឧត្តម ហ៊ុន ម៉ានី ទៅព្រះមហាក្សត្រ។
ឯកឧត្តមថា៖ «គេមានគណៈកម្មការគេទី ១ និងទី ២ សម្តេច (សម្តេច ហេង សំរិន) ពិនិត្យចុងក្រោយគឺដោយសារឃើញឯកឧត្តម ហ៊ុន ម៉ានី មានស្នាដៃសំខាន់ៗបានទទួលរង្វាន់ស្អីៗខ្លះទើបគណៈកម្មការសម្រេចជូន ជាតូបការឲ្យគាត់ហ្នឹងជាលក្ខណពិសេសហើយ»។
ឯកឧត្តមបានឲ្យដឹងថា គ្រឿងឥស្សរិយយសជាតូបការមិនមែនជាគ្រឿងឥស្សរិយយសធំជាងគេទេពោលគឺ នៅមានគ្រឿងឥស្សរិយយសផ្សេងទៀតដែលមានឋានៈស្មើនិងខ្ពស់ជាងនេះ។
កន្លងទៅ ឯកឧត្តម ហ៊ុន ម៉ានី ធ្លាប់បានទទួលពានរង្វាន់សន្តិភាពអន្តរជាតិ GUSI Peace Prize ប្រចាំឆ្នាំលើកទី ១៤ នៅប្រទេសហ្វីលីពីន និងនៅថ្ងៃ ២៤ ធ្នូ ឆ្នាំ ២០១៥ ទទួលបានគ្រឿងឥស្សរិយយសថ្នាក់សេនាជាមួយតំណាងរាស្ត្រ ១២២ រូបផ្សេងទៀត៕
ប្រភព៖ postkhmer
ចំនួនអ្នកទស្សនា
- ថ្ងៃនេះ6621
- ម្សិលមិញ6261
- សប្តាហ៍នេះ25001
- ខែនេះ140151
- ឆ្នាំនេះ140151
- សរុប20582607